வரு இணைப்புகள் (Backlinks)

வரு இணைப்புகள் (Backlinks) பற்றி அண்மையில் ஒரு நண்பர் கேள்விகள் கேட்டிருந்தார். இது பற்றிச் சொல்லவே இந்தப் பதிவு:

1. வரு இணைப்பு என்றால் என்ன?
நம் இடுகைக்கு வேறு ஒருவர் இணைப்பு கொடுத்து எழுதும் பொழுது அது நம் இடுகையில் வரு இணைப்பாகத் தெரியும். எடுத்துக்காட்டுக்கு, இடுகை(1)இல் இருக்கும் சில கருத்துகளை மேற்கோளிட்டு நாம் ஒரு இடுகை(2) இடுகிறோம். இடுகை(2)வில் இடுகை(1)இன் பதிவு முகவரியை மீயிணைப்பாகக் (hyperlink) கொடுக்க வேண்டும். இதனால், மூல இடுகையான இடுகை(1)இல் உங்கள் இடுகை(2)ன் பெயரும், முகவரியும் பின்வழித் தொடர்பாகப் பதிவாகிவிடுகிறது.

2. வரு இணைப்பு உருவாக்க, இடுகையின் பெயரையும் முகவரியையும் பதிவில் எங்கு வேண்டுமானாலும் கொடுக்கலாமா?
ஆம். பின்வரும் இடங்களில் எல்லாம் கொடுக்கலாம்:
அ. இடுகையின் தலைப்பின் கீழ் வரும் link என்ற பகுதியில் (சிலருக்கு இந்த field வராது. அதற்குச் சில settings செய்ய வேண்டி இருக்கிறது)
ஆ. இடுகையின் உள்ளே.
இ. பின்னூட்டங்களில்.

3. இந்த மூன்று இடங்களில் எப்படிக் கொடுத்தாலும் அந்தப் பதிவிற்கு வரு இணைப்பு உருவாகுமா?
இல்லை. எடுத்துக்காட்டுக்கு, இந்தப் பதிவின் பழைய இடுகைகளைக் கொடுப்போம். http://tamilblogging.blogspot.com/2007/02/blog-post_22.html - இப்போது இந்த முகவரியை மற்றுமொரு கட்டுரைப் பகுதியாக எழுதி இருக்கிறேன். இப்படி முகவரியாக இல்லாமல், எழுத்தாக எழுதும் பொழுது பின்வழித் தொடர்பு உருவாவதில்லை. முகவரியுடன் இணைப்பும் கொடுத்தால் மட்டுமே வரு இணைப்பு உருவாகும்.

4. முகவரியுடன் இணைப்பு கொடுப்பது என்றால் ?

இந்த இடத்தில் கொடுத்திருப்பது போல், சொடுக்கிப் பார்க்கக் கூடிய இணைப்பாக இந்த முகவரிகளைக் கொடுத்தால் மட்டுமே அவற்றிற்கு வரு இணைப்பு உருவாகும்.

5. சில சமயம், இது போல் இணைப்புகளாகக் கொடுத்தாலுமே வரு இணைப்புகள் உடனடியாக உருவாவதில்லை. அது ஏன்?
வரு இணைப்பு உருவாக்குவது ப்ளாக்கரின் ஒரு தனிப்பட்ட வேலை. ஒரு நாளைக்கு ஒரு முறை எல்லாப் பதிவுகளுக்கும் வரு இணைப்பு உருவாக்கப் பட்டுள்ளதா என்று தேடிப் பார்த்து இற்றைப்படுத்துகிறது (update) ப்ளாக்கர். இதனால், உங்கள் பதிவுக்கு இணைப்பு கொடுத்து யாரேனும் எழுதி இருந்தால் இருபத்திநாலு மணிநேரத்துக்குள் இந்த வரு இணைப்பு உருவாகிவிடும்.

6. நம் பதிவிற்கு இணைப்பு கொடுத்து யாராவது எழுதி இருக்கிறார்களா இல்லையா என்பதை எப்படித் தெரிந்து கொள்வது?
இதற்கும் பல வழிகள் உள்ளன:
அ. நம் பதிவின் comment settings இல் Show backlinks என்பதை ஆமோதித்திருந்தால், சுலபமாக வந்துவிடும். நம் இடுகையின் கீழேயே இந்த இணைப்பு உருவாகி அதைப் பார்த்துவிடலாம்
ஆ. கூகிள் பதிவுத்தேடல் வந்த பின்னர், இன்னும் வசதியான வழியாகிவிட்டது. இந்த கூகிள் பதிவுத் தேடலில் உங்கள் பதிவின் முகவரியை, "link:yourblog.blogspot.com" என்று கொடுத்துத் தேடினாலே தெரிந்துவிடும்.
இ. இப்படி கூகிள் தேடலில் கண்டுபிடிப்பவற்றைத் தனி RSS ஓடையாக்கி அதை உங்கள் பதிவின் பக்கப் பட்டியிலேயே இணைத்துக் கொள்ளலாம். இதன் மூலம் அன்றாடம் உங்கள் பதிவைக் குறிப்பிட்டு எழுதப் படும் இடுகைகளைக் குறிப்பாகத் தேடிப் பெறலாம். எடுத்துக்காட்டுக்கு என் பதிவில் "சமீபத்தில் பொன்ஸ் பற்றிப் பிளிறியவர்கள்" என்ற பகுதி இதையே சுட்டுகிறது.

7. இந்த வரு இணைப்புப் பட்டியலால் என்ன நன்மை?
உங்களைப் பற்றி, உங்கள் பதிவைப் பற்றி யாரேனும் எழுதி இருந்தால் தேடாமல் தெரிந்து கொள்ளலாம். ஏதேனும் விவாதப் பதிவுகளில் படிப்பவர்களுக்கு மற்ற விவாதங்களைச் சுலபமாகத் தேடித் தெரிந்து கொள்ள வசதியாக இருக்கும்.

8. வரு இணைப்பை நம் பதிவில் தெரிவு செய்வதால் என்ன பிரச்சனைகள் வரலாம்?
சில சமயம் தேவையில்லாத பதிவுகள், நாம் விளம்பரம் கொடுக்க விரும்பாத பதிவுகளின் தலைப்பு - முகவரி இவை நம் பதிவில் தெரிந்துவிட வாய்ப்பிருக்கிறது. வரு இணைப்பு என்றால் அதை அழித்து விடலாம். பக்கப் பட்டியில் அழிக்க முடியாது.